DIPOLOG CITY– Gipangunahan ni Dipolog City Mayor Roberto “Berto” Y. Uy ang Prayer for Good Governance nga gihigayon niadtong Enero 30, alas 2:00 sa hapon, didto sa Zamboanga del Norte Convention and Sports Center. Mitambong ang mga kawani sa Probinsyal nga Pangagamhanan ilawom sa liderato ni Governor Darel Dexter T. Uy, lakip ang mga empleyado sa lokal nga pangagamhanan sa Dakbayan sa Dipolog.
Tumong sa kalihokan ang pagpalig-on sa espirituhanong pagtuo sa mga kawani sa gobyerno, pagdasig sa matarong ug matinud-anong pagpangulo, ug pagpaniguro nga ang pag-alagad sa katawhan magapadayon uban ang integridad ug pagkamaluluy-on.
Mipadayag og mga testimonya ang retiradong kawani sa Bangko Sentral ng Pilipinas nga sila Pastor Cezar F. Arceo, Pastor Rufino Gomez, ug Pastor Diwa C. Guinigundo, nga naghatag og inspirasyon ug giya sa mga kawani sa gobyerno. Pinaagi sa maong kalihokan, gipakita ang hiniusang paningkamot sa lokal ug probinsyal nga pangagamhanan sa pagpasiugda sa maayong pangalagad nga ginaugmad sa pagtuo, responsibilidad, ug matinud-anong pamunoan.(JENIFFER JR. DELICA)
Source: Zamboanga del Norte Provincial News Network