Aron mas mapalig-on ang kapasidad sa mga lokal nga stakeholders sa pagbatok sa ilegal nga droga, gipahigayon sa Department of the Interior and Local Government (DILG) Region IX ang usa ka adlaw nga SICAP-BADAC 3.0 (Strengthening Institutional Capacities of Barangay Anti-Drug Abuse Councils) training.
Gipangulohan ni Police Captain Sarah Grace B. Marcojos, Chief of Community Affairs Section, ang diskusyon kabahin sa papel sa Barangay Anti-Drug Abuse Councils (BADAC) sa pagtipig ug pagreport sa impormasyon, lakip na ang epektibong pamaagi sa pagkolekta niini. Gisundan dayon kini ug workshop aron mapalambo ang katukma ug pagkahiusa sa mga report sa barangay level.
Samtang, si LGOO VI Lizzette Regine R. Boltiador, Assistant Division Chief sa Local Government Monitoring and Evaluation Division (LGMED), mipatin-aw sa papel sa mga barangay sa pagpanguna sa Barangay Drug Clearing Program, ug mipasabot sa kahinungdanon sa tinabangay nga responsibilidad aron mapadayon ang mga “drug-free” nga komunidad.
Ang maong kalihokan nakapahugot sa kooperasyon tali sa mga opisyal sa barangay, kapulisan, ug mga ahensya sa nasudnong kagamhanan. Pinaagi sa SICAP-BADAC 3.0, padayon ang paningkamot sa DILG IX sa pagpabakod sa kapasidad sa mga barangay aron makab-ot ang usa ka lig-on, tinabangay, ug luwas nga rehiyon nga walay droga.(IKEN B. GULLEM)
Source: DILG REGION 9