Gipahigayon sa Department of Agrarian Reform (DAR) Zamboanga del Norte kagahapon, Nobyembre 10, 2025, sa Dipolog City ang usa ka konsultasyon uban sa piniling Agrarian Reform Beneficiaries Organizations (ARBOs) aron mapalambo ang koneksyon sa negosyo ug pagpamaligya sa ilang mga produkto pinaagi sa enterprise development ug market linkaging.
Ang kalihokan nagtumong sa pag-abli og oportunidad alang sa mga ARBOs nga makahatag sa ilang lokal nga produkto ngadto sa dagkong tiggamit ug institusyonal nga merkado, aron masiguro ang padayon nga panginabuhian ug mapalambo ang suporta sa pagkaong gikan mismo sa lokal nga komunidad.
Gipasabot ni Provincial Agrarian Reform Program Officer II Daisy Dell Suan Digamon nga pinaagi sa lig-on nga koneksyon sa merkado, mas mapadayon ang kalampusan sa agrarian reform tungod kay kini nagkonektar sa mga mag-uuma ngadto sa tinuod nga oportunidad nga maghatag og dugay nga panginabuhian ug kauswagan sa komunidad.(JENIFFER JR. DELICA)
Source: DAR Zambonorte