Malampusong gipangulohan sa Department of Agrarian Reform (DAR) ang Farm Business School (FBS) Graduation ug Harvest Festival nga gipahigayon sa Barangay El Paraiso, usa ka dakong lakang sa pagpalig-on sa kahibalo ug abilidad sa mga mag-uuma sa munisipalidad sa Liloy.
Isip pangunahing ahensya nga nagpatuman sa FBS Program, nagpakita ang DAR sa lig-on nga komitment sa pagpalambo sa agri-negosyo sa mga benepisyaryo pinaagi sa paghatag ug modernong kaalam sa pagdumala sa uma, pagnegosyo, ug pagplano alang sa dugayng kalamboan. Ang kalampusan sa programa usa ka timailhan sa padayon nga paningkamot sa LGU Liloy nga mapaapsan ang kapasidad sa mga lokal nga mag-uuma aron mahimong mas produktibo ug mas kompetitibo.
Mas napuno ang kahulogan sa selebrasyon sa presensya ni DAR Officer II Ma’am Daisy Dell S. Digamon, kauban nila Board Member Leo Nicanor B. Mejorada, BM Venus A. Uy, ug BM Kay Marie P. Bolando. Ang ilang walay puas nga suporta nagpadayon sa pagpalig-on sa mga agrarian reform communities ug pagpasiugda sa malinawon, malungtarong pag-uswag sa agrikultura.
Mainiton usab nga gipanghinaut sa lokal nga pangagamhanan nga ang maong kalampusan magmugna ug bag-ong henerasyon sa mga mag-uuma nga andam moangkon sa hagit ug oportunidad sa modernong agrikultura.
Gilauman nga pinaagi sa ilang nakuha nga kaalam, mas daghang oportunidad sa inobasyon, kalamboan, ug agrikultural nga kalampusan ang moabut sa komunidad sa Liloy.(IKEN B. GULLEM)
Source: Municipality of Liloy