Nagpahigayon ug kusog nga panawagan batok sa pagpanlupig sa kababayen-an ug kabataan ang Department of Agrarian Reform (DAR) atol sa ilang community outreach sa Barangay Sta. Isabel, Dipolog City, isip kabahin sa 18-Day Campaign to End Violence Against Women and Children, usa ka panaghiusa nga aktibidad sa DAR, Department of Agrarian Reform Employees Association (DAREA), ug DAR Employees Multipurpose Cooperative (DAREMCO).
Gipangulohan kini ni PARPO II Daisy Dell Suan Digamon kauban sila OIC PARPO I/CARPO-PBDD Engr. Alfonso Tan, DAREMCO Chairperson MARPO Anjanette Nemiaga, DAREA President Mary Cherel Buburan, ug uban pang opisyales sa DAR. Suportado usab kini sa Barangay Sta. Isabel pinaagi ni Kagawad Liza Jarmin, gipasiugdahan sa kalihokan ang padayon nga paningkamot sa ahensiya sa pagpanalipod sa labing mahuyang nga sektor sa komunidad.
Gitutokan sa mga mensahe ug learning sessions ang kahinungdanon sa kabalaka, proteksiyon, ug pag-empower sa kababayen-an ug kabataan, ilabi na kadtong nag-antos sa hilom nga pagpang-abuso. Gibutyag sa presensya sa nagkadaiyang lider sa DAR ang ilang tibuok nga pagtan-aw sa serbisyo publiko, gikan sa agrarian reform hangtod sa pagpalig-on sa sosyal nga hustisya ug kaluwasan sa komunidad.
Naghatag usab ug kainit sa kalihokan ang partisipasyon sa mga bata sa Sta. Isabel Day Care, nga nagpahinumdom sa tanan sa importansya sa pagtukod ug luwas, mahigugmaon, ug nurturing nga palibot.(IKEN B. GULLEM)
SOurce: DAR Zambonorte