Mibagting pag-usab ang ngalan sa Dapitan City sa nasyonal nga lebel human kini makadawat sa Seal of Child-Friendly Local Governance gikan sa Department of Social Welfare and Development (DSWD) ug Department of the Interior and Local Government (DILG), kaniadtong Nobyembre 22, 2025.
Ang maong dungog nagpakita sa padayon nga paningkamot sa lungsod sa pagpanalipod ug pagpalambo sa katungod sa kabataan pinaagi sa epektibong mga programa ug inklusibong polisiya. Ang CSWDO ubos ni Ms. Marilyn Sy mitabang sa pagpasiugda sa mga inisyatibang nakapunting sa kabataan, aron masiguro nga kini makaabot sa labing vulnerable nga sektor.
Gawas sa maong pasidungog, gidayeg usab sa DSWD ug DILG ang Dapitan tungod sa dakong kontribusyon niini sa social welfare and development programs sa nasud. Gipasidunggan ang syudad tungod sa aktibong mga kalihokan sa paglig-on sa social protection, pagtabang sa mga pamilya, ug pagpatuman sa mga programang nagpauswag sa kalidad sa kinabuhi sa mga komunidad.
Kini nga pasidungog nagpalig-on sa dungog sa Dapitan City isip modelo sa inklusibong lokal nga pangagamhanan, resulta sa tinabangay nga paningkamot ni Mayor Evelyn T. Uy, CSWDO, ug ubang sektor sa paghimo og luwas ug mauswagon nga palibot alang sa kabataan ug pamilya.(IKEN B. GULLEM)
Source: City Government of Dapitan