Gipasidunggan ang Dapitan City pinaagi sa SubayBAYANI Award 2025 tungod sa “Ekselensya sa Pagdumala sa Inprastraktura,” nga gidawat ni Mayor Evelyn T. Uy ug Vice Mayor Hon. Gabriel M. Cad sa seremonya nga gihimo sa The Manila Hotel niadtong Nobyembre 26, 2025. Giila sa Department of Interior and Local Goverance ang siyudad tungod sa klaro, episyente, ug matinud-anong pagdumala sa proyekto sa inprastraktura.
Ang SubayBAYANI Awards, nga gisugdan niadtong 2021, nagpasidungog sa mga LGU nga nagpakita ug lig-on nga pamalaod, inobasyon, ug kalidad sa serbisyo publiko. Usa kini ka national recognition program nga nag-awhag sa LGUs sa pagpasiugda sa maayong praktis ug sustinableng pagserbisyo sa katawhan.
Sa seremonya, gidayeg ang mga awardee sa ilang kontribusyon sa transparensiya, participatory governance, ug aktibong pag-apil sa komunidad. Gipasalamatan usab ang suporta sa lokal nga liderato ug mga partner sa komunidad nga nanguna sa nagkalain-laing inisyatiba.
Gipasabot sa SubayBAYANI ang papel sa komunidad ingon “mga bayani sa pagmonitor” sa mga proyekto alang sa kaayohan sa publiko. Ang pasidungog nagpakita nga ang kalampusan sa mga programa nag-agad sa pagtambayayong sa liderato ug katawhan.
Ang dungog nga nadawat sa Dapitan City nagpamatuod sa dedikasyon sa LGU sa paghatag og limpyo, klaro, ug epektibong serbisyo alang sa padayong kalamboan sa siyudad.(IKEN B. GULLEM)
Source: Zamboanga del Norte Provincial News Network