Naglusad og direktang aksyon ang lokal nga gobyerno sa Dapitan City batok sa posibleng overpricing ug abuso sa presyo sa gasolina human sa padayon nga pagsaka sa fuel costs.
Pinaagi sa Local Price Coordinating Council (LPCC), gipahigayon ang usa ka koordinasyon nga miting niadtong Abril 15 nga nagtigom sa nagkadaiyang ahensya sa gobyerno ug mga opisina sa LGU aron palig-onon ang monitoring ug enforcement sa presyo sa petrolyo.
Kini nga kalihokan kabahin sa direktiba sa Department of the Interior and Local Government (DILG) nga nag-awhag sa tanang lokal nga panggamhanan nga molihok aron mapagaan ang epekto sa kasamtangang kahimtang sa ekonomiya ngadto sa katawhan.
Human sa miting, gilusad dayon ang joint inspection operation sa mga gasolinahan sa siyudad uban ang Philippine National Police (PNP) ug Bureau of Fire Protection (BFP).
Upat ka team ang giporma aron mosusi sa eksaktong presyo sa gasolina, pagbutang sa price boards, ug pagsunod sa mga regulasyon nga gitakda sa Department of Energy. Apil usab sa ilang gibantayan ang posibleng hoarding, profiteering, ug dili makatarunganong pagtaas sa presyo.(IKEN B. GULLEM)
Source: City Government of Dapitan