Sa pag-abli sa masidlak nga “lights-on ceremony” sa Dapitan City, mipaabot si Mayor Evelyn T. Uy ug mensahe nga nagdasig sa pagkahiusa ug paglaum, ilabi na kay mao kini ang iyang pinakaunang Pasko isip mayor sa siyudad.
Gibutyag sa alkalde nga ang kahayag sa siyudad dili lamang dekorasyon, kundili simbolo sa kusog, kaisog ug panaghiusa sa mga Dapitanon. Matud pa niya, sama sa pahimangno sa pari, dili ang mga suga ang nagpasiga sa Pasko, kondili ang pag-abot sa manluluwas nga naghatag ug kahayag sa kalibutan.
Gipasabot usab ni Mayor Uy nga ang Pasko panahon sa pagpahulay, pagpamalandong ug pagpakita sa pagkamaayo.
Isip mayor, misaad siya sa pagdumala uban ang kalooy, integridad ug tinud-anay nga tinguha nga mapaangat ang tanang Dapitanon. Gidani niya ang publiko nga magpadayon sa pagkahiusa aron ang siyudad mosidlak dili lamang karong gabhiona kondili matag adlaw.
Sa pagtapos, gipanghinaut ni Mayor Uy nga ang kahayag sa Pasko magdala ug kalinaw, kalipay ug paglaum sa matag panimalay samtang opisyal nang gipadagan ang kahayag sa mga parol ug dekorasyon sa siyudad.(IKEN B. GULLEM)
SOURCE: Zamboanga del Norte Provincial News Network