Gidumala sa City Government of Dapitan, uban sa Department of the Interior and Local Government (DILG), ang Capacity Building Seminar alang sa husto ug epektibong pagpatuman sa Indigenous Peoples Mandatory Representation (IPMR) kaniadtong Nobyembre 13, 2025, sa Amphitheater sa Government Center.
Tumong sa kalihukan ang pagpalig-on sa partisipasyon sa mga Lumad sa lokal nga pangagamhanan ug masiguro nga ang ilang katungod, tradisyon, ug kultura maapil sa paghulma sa mga polisiya ug programang pangkalamboan sa dakbayan.
Lakip sa mga mamumulong atol sa seminar mao si Mr. Jessril D. Ruales nga mituki sa Customary Law, si Datu Fred Andus nga mipresentar sa Republic Act 8731 o Indigenous Peoples Rights Act (IPRA) of 1997, ug si CLGOO Monette S. Ruaya-Ahmad nga mitambag sa Local Selection Guidelines ug BNEO Orientation para sa mga Lumad.
Mitambong usab sa kalihukan sila Vice Mayor Gabriel M. Cad, City IMPR Hon. Rey C. Aguilar Jr., mga sakop sa Sangguniang Panlungsod nga sila Hon. Raul Carreon, Hon. Atty. Jeneth N. Baje, Hon. Ruel Nadela, ug Hon. Lyza Salazar, kauban ang mga tribal leaders, barangay captains, ug IPMR representatives gikan sa nagkalain-laing barangay.
Nagpakita ang maong aktibidad sa padayon nga pagpaningkamot sa lokal nga pangagamhanan sa pagkab-ot sa inklusibong panggobyerno—usa ka tinguha nga masiguro nga ang mga komunidad sa Lumad dili lamang marepresentar, kondili aktibo usab nga makahatag og kontribusyon sa kalamboan ug mga desisyong gihimo alang sa Dapitan.(IKEN B. GULLEM)
Source: City Government of Dapitan