Naglusad ang City Government of Dapitan ug TINDAPITAN 2025, usa ka espesyal nga Christmas marketplace nga naghatag oportunidad sa mga bag-ohay pa ug kasamtangang negosyante aron maipakita ang ilang kakanin, init nga ilimnon, ug tradisyonal nga lamiang pagkaon nga kasagarang ginakaon sa Simbang Gabi ug Misa de Gallo, nga pagasugdan karonh Disyembre 15, 2025.
Gitumong ang inisyatibo sa pagsuporta sa nagtungha nga Dapitanon entrepreneurs samtang ginapadayon ang lokal nga pagkaon ug tradisyon nga kabahin sa kabilin sa Pasko.
Gisiguro sa lokal nga kagamhanan ang kahapsay sa operasyon sa merkado, nga molihok sa alas 3:00 sa kaadlawon para sa Misa de Gallo ug alas 8:00 sa gabii para sa Simbang Gabi.
Ang lokasyon sa TINDAPITAN anaa duol sa Rizal Memorial Institute, ug adunay booths nga ihatag alang sa mga partisipante.
Gihangyo ang gusto moapil nga negosyante nga motultol sa Business Permit and Licensing Division (BPLD) ug kang Ma’am Susan Empeynado sa Economic Enterprise alang sa aplikasyon ug pagbayad sa aplikableng fees.
Pinaagi sa TINDAPITAN 2025, gipalambo sa Dapitan City ang lokal nga kultura, pagkaon, ug panginabuhian, usa ka panawagan sa katawhan nga suportahan ang produkto sa kaugalingong komunidad ug ipadayon ang lami nga tradisyon nga nagdala ug kainit sa panahon sa Pasko.(IKEN B. GULLEM)
Source: City Government of Dapitan