Malampuson nga gilusad kaniadtong Nobyembre 28, 2025 ang “Rice for All” program pinaagi sa pormal nga Launching ug Memorandum of Agreement Signing nga gipahigayon sa Zamboanga del Norte Convention and Sports Center.
Gipangulohan ang kalihokan ni Department of Agriculture Secretary Francisco Tiu Laurel, kauban si Governor Darel Dexter T. Uy ug DA-9 OIC-Regional Director Vener L. Dilig. Mitambong usab ang provincial officials, Board Members, 3rd District Representative Adrian Michael Amatong, mga mayor sa duha ka dakbayan ug daghang kalungsoran, ug mga representante gikan sa nagkalain-laing barangay.
Ang aktibidad nagtimaan sa paglusad sa P20 Rice Project, nga kabahin sa mas lapad nga “Rice for All” initiative sa national government aron mapalapad ang access sa barato ug kalidad nga bugas. Nakigsabot pinaagi sa MOA ang Department of Agriculture ug 25 ka lungsod ug 2 ka dakbayan sa probinsya aron masiguro ang maayong pag-implementa sa programa.
Isip simbolo sa pagtukod sa proyekto, adunay aktwal nga pagbaligya ug 20-pesos-per-kilo nga bugas ngadto sa mga residente nga mitambong sa kalihokan. Ang inisyatiba nagtumong sa pagtabang sa mga konsumante pinaagi sa pagminus sa gasto sa bugas ug paghatag ug mas masaligan nga suplay sa pagkaon sa probinsya.
Sa maong programa, gipahigayon usab ang pirmahay sa MOA tali sa mga opisyal sa DA ug lokal nga pangagamhanan aron lig-onon ang pagtambayayong sa pagpadagan sa proyekto sa tibuok Zamboanga del Norte.(IKEN B. GULLEM)
Source: Dipolog City Government