Andam na ang dakbayan sa Dipolog ilawom liderato ni Mayor Roberto Y. Uy sa pag-obserbar sa umaabot nga “Kalag-Kalag” karong Nobyembre 1 ug 2, uban sa mga lakang aron masiguro ang kaluwasan sa publiko ug kahapsay sa trapiko sa palibot sa mga sementeryo.
Sa panagtigum sa nagkalain-laing lokal ug nasudnong ahensiya, gipahimutang ang mga responsibilidad sa matag ahensiya alang sa kaluwasan sa mga bisita ug kahapsay sa dalan. Giandam ang temporaryong pagsira sa pipila ka dalan ug rerouting sa trapiko palibot sa mga sementeryo.
Lakip sa mga pagbag-o, ang entrance sa Century Memorial Park sa Barangay Gulayon, aron malikayan ang congested nga trapiko tungod sa gamay ug hugot nga dalan. Ang mga lakang ipatuman sugod ala una sa hapon sa Oktubre 31 hangtod ala una sa hapon sa Nobyembre 2.
Samtang, andam usab magbantay ug motubag sa insidente ang kapulisan, sama sa Bureau of Fire Protection, Office of the Building Official, City Disaster Risk Reduction and Management, City Health, ug Traffic Management.
Ang temporaryong closures ug rerouting gisunod sa mga rekomendasyon sa Barangay Council ug sa pamuno sa Century Memorial Park aron malikayan ang kasamok nga nasinati sa miaging tuig.
Gihangyo sa lokal nga kagamhanan ang pagsabot ug kooperasyon sa katawhan aron malinawon, luwas, ug hapsay ang pag-obserbar sa Kalag-Kalag.(IKEN B. GULLEM)