Gipasidunggan niadtong Nobyembre 21, 2025 ang Dapitan City sa inaugural Philippine Smart and Sustainable Communities Award (PSSCA) sa Centennial Arena, Laoag City, tungod sa nagkalain-laing inisyatibo nga nagpalambo sa teknolohiya ug kalikupan sa lungsod.
Gidayeg ang Dapitan City sa Level 3 Sustained SSC Award sa Sustainability tungod sa Enhance Tax Revenue Assessment and Collection System (E-TRACS) ug ang migration niini ngadto sa Electronic Business One-Stop Shop (E-BOSS). Nakakuha usab ang lungsod og Level 2 Expanding SSC Award sa Sustainability alang sa Personnel Management Information System (PMIS), ug mga pasidungog sa Human Well-Being alang sa “Ride Smart, Ride Green” E-Trike initiative ug ang CharM Powered Dapitan City charging project. Nadawat ang awards nila Ms. Susan Empeynado ug Mr. Art Noel Empeynado uban sa DOST Region IX (Department of Science and Technology Region IX) nga gipangulohan ni OIC Regional Director Rosemarie Salazar ug Provincial Director Nuhman Aljani.
Gipadayag sa DOST-IX ang pagpasalamat ug pag-ila sa Dapitan City tungod sa pagpanguna sa smart ug sustainable nga mga solusyon. Ang pagkadaug nagpakita sa padayon nga paningkamot sa lungsod sa pagpalambo sa serbisyo publiko ug paghatag og kahigayunan alang sa komunidad.(JENIFFER JR. DELICA)
Source: DOST Regional Office Region IX