Nakabaton og dakong kalampusan ang Dipolog City Police Station pinaagi sa Special Drug Enforcement Team human madakpan ang usa ka persona atol sa drug buy-bust operation nga gipahigayon alas 9:40 sa gabii niadtong Pebrero 7, 2026, sa Purok Santan 1, Barangay Gulayon, Dipolog City. Ang operasyon gipangulohan sa Chief of Police isip lead unit, uban ang suporta sa Regional Drug Enforcement Unit IX, Zamboanga del Norte Provincial Mobile Force Company, Zamboanga del Norte Maritime Police Station, ug sa koordinasyon sa Philippine Drug Enforcement Agency Region Nueve.
Ang nadakpan mao ang 45 anyos, minyo, walay trabaho, ug residente sa maong lugar. Sa panahon sa operasyon, narekober gikan sa iyang pagpanag-iya ang tulo ka gagmayng plastic sachet nga adunay puti nga kristal nga gituohang shabu, lakip ang usa ka sachet nga gigamit isip buy-bust evidence, duha ka sachet nga narekober gikan sa iyang hawid, usa ka 500-peso bill nga marked money, usa ka open plastic sachet, ug usa ka piraso nga folded foil.
Ang tanang narekober nga iligal nga droga adunay kinatibuk-ang gibug-aton nga usa ka gramo nga may standard nga balor nga 6,800 pesos. Ang mga drug evidence giturn-over na sa Zamboanga del Norte Provincial Forensic Unit alang sa eksaminasyon, samtang ang suspek anaa na sa kustodiya sa Dipolog CPS alang sa hustong proseso ug pagpasaka sa kaso.(JENIFFER JR. DELICA)
Source: Dipolog City Police Station, ZNPPO