Naghiusa si Third District Congressman Adrian Amatong, ang mga mayor sa ikatulong distrito sa Zamboanga del Norte, ug ang Department of Social Welfare and Development niadtong Enero 5 aron hisgutan ang pagpalig-on sa social welfare programs sa distrito.
Atol sa miting uban ni DSWD Secretary Rex Gatchalian, gipadayag sa mga lokal nga lider ang nag-unang kahimtangan sa ilang mga komunidad, ilabina sa sektor nga naapektuhan sa kakabus, kalamidad, ug ubang krisis. Gituki usab ang mas lig-on nga koordinasyon tali sa local government units ug DSWD aron mas paspas ug epektibo ang paghatod sa serbisyo.
Gipasiugda ni Cong. Amatong ang padayon nga komunikasyon tali sa lokal ug nasyonal nga ahensya aron masiguro nga ang tabang makaabot dayon sa mga nanginahanglan, samtang gilauman nga ang nahisabutan nga kooperasyon maghatag og dugang benepisyo sa katawhan sa Zamboanga del Norte.(JENIFFER JR. DELICA)