Gidala ni Cong. Ian Amatong sa Senado ang nag-unang mga isyu nga giatubang sa Zamboanga del Norte, lakip na ang kakulang sa classrooms ug ang padayon nga pagsaka sa presyo sa lana, atol sa iyang pakigpulong sa mga lider sa Senado.
Niadtong lunes, nakigkita si Cong. Amatong uban ni Gov. Darel Dexter Uy ngadto kang Sen. Bam Aquino ug Sen. Tito Sotto sa Senate of the Philippines aron hisgutan ang mga programa ug suporta nga makatabang sa probinsya.
Sa pakigpulong kang Sen. Aquino, gipasabot ni Cong. Amatong ang kahimtang sa edukasyon sa probinsya, ilabi na ang kakulang sa classrooms ug ang panginahanglan sa pag-ayo ug pagpaayo sa mga pasilidad sa eskwelahan aron masiguro ang luwas ug maayong palibot sa pagtuon sa mga estudyante.
Samtang sa pakigkita kang SP. Sotto, gipadayag usab ni Cong. Amatong ang kabalaka sa probinsya mahitungod sa Local Government Support Fund (LGSF) ug sa epekto sa padayon nga pagsaka sa presyo sa lana nga direktang nakaapekto sa transportasyon, panginabuhian ug adlaw-adlaw nga gastohan sa mga pamilya.
Giingon sa kongresista nga ang maong mga panaghisgot kabahin sa padayon nga paningkamot sa pagdala sa mga kabalaka sa Zamboanga del Norte ngadto sa nasyonal nga lebel aron makapangita og praktikal ug dugayng solusyon alang sa katawhan.
Mitambong usab sa maong engagement ang pipila ka mayor sa Zamboanga del Norte, nga nagpakita sa panaghiusa sa mga lider sa probinsya ug lokal nga gobyerno sa pagpalambo sa mga programa ug polisiya alang sa kaayohan sa katawhan.(IKEN B. GULLEM)
Source: Team Adrian Amatong