Gisugdan na sa Dapitan City ang pagpatuman sa bag-ong tulo ka tuig nga plano batok sa kakulangon human giaprobahan ang 2026–2028 City Poverty Reduction Action Plan (CPRAP) niadtong milabay nga adlaw sa Amphitheater, Government Center, atol sa panagtigom niini sa City Poverty Reduction Action Committee (CPRAC).
Gipangulohan ang maong miting ni Mayor Evelyn Belen T. Uy uban sa mga miyembro sa CPRAC. Samtang, gipresentar ni Ms. Ma. Ailyn Catipay gikan sa City Planning and Development Office ang mga prayoridad sa plano, nga nagpunting sa konkretong mga lakang aron masulbad ang hinungdan sa kakulangon sa lokal nga lebel.
Human sa presentasyon, nagkahiusa ang mga miyembro sa komitiba sa pag-apruba ug opisyal nga pagsagop sa maong plano. Tumong usab niini nga masiguro nga ang mga programa sa lokal nga panggamhanan mas moabot sa mga kabus ug vulnerable nga sektor sa komunidad.(IKEN B. GULLEM)
Source: City Government of Dapitan