Sa umaabot nga 2026 BOSS Ironman Motorcycle Cup, naapil ang ruta sa Syudad sa Dipolog ug probinsya sa Zamboanga del Norte, nga magsugod sa General Santos City karong Enero 31.
Gatusan ka mga big displacement motorcycle riders gikan sa nagkalain-laing dapit sa nasud ang gilauman nga moagi sa probinsya. Ang Siayan maoy entry point sa Zamboanga del Norte, samtang ang Sindangan natudlong checkpoint. Ang Dipolog City maoy mandatory stop and rest checkpoint diin markahan ang BIMC passport sa mga partisipante.
Magpahigayon og welcome program sa Food Hub sa Dipolog City Boulevard nga pangulohan ni Mayor Roberto Y. Uy ug Governor Darel Dexter T. Uy alang sa mga riders ug opisyal sa kalihokan.
Ang Boss Ironman Motorcycle Cup gipasiugdahan sa BMW Owners’ Society of Saferiders Inc. (BOSS), usa ka SEC-registered nga asosasyon sa mga mahiligon sa dagkong motorsiklo.
Magsugod ang biyahe alas-5 sa buntag gikan sa General Santos City ug molabay sa Cotabato City, Sultan Naga Dimaporo, Zamboanga del Norte, Oroquieta City, Cagayan de Oro City, Valencia City ug Digos City, ug matapos pagbalik sa GenSan sa Pebrero 1.
Gibana-bana nga moabot sa Dipolog City ang mga riders mga alas-12 sa tungang gabii sa Enero 31 ug mogikan usab alas-4 sa sayong buntag sa Pebrero 1.(IKEN B. GULLEM)
Source: Zamboanga del Norte Provincial News Network