Nagpatawag og miting ang City Disaster Risk Reduction and Management Council (CDRRMC) alang sa ika-tulong hugna sa ilang quarterly meeting sa 2nd Floor Social Hall ning dakbayan sa Dipolog, Hulyo 24, 2025.
Ang miting gipangulohan sa City Disaster Risk Reduction and Management Office ubos sa liderato ni CDRRM Officer Atty. Arvin L. Bonbon, ug gipresidihan ni City Vice Mayor Senen O. Angeles. Si City Mayor Roberto Y. Uy ang miserbisyo isip Council Chairman. Mitambong usab ang mga miyembro sa CDRRMC ug mga kauban nga ahensiya.
Lakip sa mga gihisgutan sa maong miting ang pinaka-ulahing weather update gikan sa PAGASA, mga lakang alang sa contingency plans batok sa nagatuhaw ug nagbalik nga mga infectious disease, ug ang gipasang-at nga Oil Spill Response and Awareness Training Program sa Philippine Coast Guard (PCG).
Tumong sa miting ang pagpalig-on sa inter-agency collaboration aron masiguro ang luwas ug andam nga komunidad sa panahon sa katalagman. (Jumalisa Papa)
Source: Dipolog City Government