Mainiton karong nagpahibalo ang kagamhanang lokal pinaagi sa Business Permits and License Division (BPLO) nga kini ang sugod na nga mo-proseso alang sa pagbag-o sa mga business permits alang sa tanang matang sa patigayon dinhi sulod sa dakbayan sa Dipolog alang ning tuig, 2024.
Mao kini ang nasayran gikan kang Ms. Viola Pino, kinsa mainiton karong naga-awhag sa tanang mga kaigsoonang magpapatigayon sa pagpa-renew na sa ilang mga lisensiya sa patigayon.
Sumala pa, nga sama sa nanglabay ‘ng mga tuig, aduna gihapo’y ipahimutang nga “One-Stop-Shop” dinha sulod sa City Hall, nga gilangkoban sa mga nag-unang buhatan nga mopirma dinha sa mga papeles sa mga aplikante.
Matud pa nga ang pagpahimutang sa One-Stop-Shop ang tuyong gihimo sa kagamhanang lokal ning siyudad, aron sa pagtabang sa atong mga kaigsoonang negosyante nga dili na mahago pa dinha sa pagpa-renew sa ilang mga lisensiya, gumikan kay hiniusa ra nga gipahimutang ang mga buhatan dinha sulod sa City Hall.
Sama sa gihapon, ang business permit renewal ang molungtad hangtud sa Enero 20, 2024, busa gi-awhagan ang tanang mga magpapatigayon sa pagpa-renew sa ilang mga lisensiya sa tempranong panahon.
Sumala pa, nga ang pagkapakyas sa pagrenew sa ilang mga business permits sulod sa gitakdang panahon ang magkahulugan ug penalty o surcharge dinha sa ilang na-andang balayronon.
(Source: Dipolog City Government Facebook page)