Nakahatag og bag-ong higayon sa pagpasundayag ug pagpreserbar sa kultura sa mga Subanen ang unang ‘Buklog Samaya’ nga gisaulog sa lungsod sa Salug niadtong Septyembre 19.
Gitambogan ang maong seremonya sa mga lider sa lokal nga panggamhanan, tribal leaders ug mga miyembro sa komunidad, diin gipasiugda ang importansya sa pagpadayon sa mga tradisyon ug mithi nga napanunod gikan sa mga katigulangan.
Mitambong usab si Governor Darel Dexter T. Uy, kinsa midiretso sa Salug gikan sa Manila aron makaapil sa selebrasyon. Sa iyang mensahe, iyang gipasiugda ang pagpreserbar sa kultura sa Subanen ug ang pagpasa niini ngadto sa mga kabataan.
Dili lamang ang mga ritwal ang iyang gihatagan og pagtagad, kondili apil usab ang mga mithi nga nalangkit sa kultura sama sa panaghiusa, pagtinabangay, respeto ug panaghigugmaay.
Sa samang higayon, gipaambit sa gobernador ang mga kalambigitan sa mga proyekto sa probinsya uban sa national government, lakip ang PRDP Farm-to-Market Road Concreting Project nga magkonektar sa Salug ug Godod. Matud niya, miabot siya sa Salug human madawat ang No Objection Letter 1 (NOL 1) alang sa maong proyekto.
Gipahayag ni Mayor Ruth Brillantes nga dugay nang gihandom sa komunidad ang paghiwat sa Buklog sa ilang lungsod. Tungod niini, naglaan ang LGU-Salug og P350,000 alang sa selebrasyon ug gihimulag kini gikan sa Araw ng Salug aron mahatagan og kaugalingong pagtagad ang kultura sa Subanen.
Gipasalamatan usab sa mayor si IPMR Hon. Emelyn D. Salagoste sa iyang mga paningkamot aron matuman ang kalihokan ug gipasalig ang padayon nga suporta sa lokal nga panggamhanan alang sa mga Indigenous Peoples.
Si Datu Fred Andus, Provincial Tribal Chieftain ug Guest of Honor, mipahayag usab sa iyang kalipay sa pagkahimo sa Buklog sa Salug. Iyang giila ang suporta sa LGU nga nakatabang aron matuman ang maong seremonya, lakip ang personal nga kontribusyon nga P100,000 gikan kang Mayor Brillantes.
Ang Buklog Samaya usa ka sagrado nga ritwal sa mga Subanen nga may kalabotan sa pagpasalamat ug pagtuman sa panaad. Labaw pa sa usa ka seremonya, nagsilbi kini nga paagi sa komunidad sa pagpadayon sa ilang kultura, tradisyon ug mga mithi ngadto sa sunod nga henerasyon.(IKEN B. GULLEM)
Source: Zamboanga del Norte Provincial News Network