DIPOLOG CITY — Gipresentar sa Bangko Sentral ng Pilipinas (BSP) sa probinsya ang Paleng-QR PH program aron ipasulod ang cashless payments sa mga merkado ug lokal nga transportasyon.
Sa ilang pagbisita kang Governor Darel Dexter T. Uy, gipatin-aw sa BSP nga tumong sa programa ang pagpalapad sa paggamit sa QR PH system aron mahimong mas sayon, luwas, ug paspas ang bayranan sa adlaw-adlaw nga transaksyon.
Ang inisyatiba ginasuportahan sa Department of the Interior and Local Government (DILG) ug naglakip sa pag-edukar sa mga drayber ug negosyante aron masabtan ang kaayohan sa digital payments.
Gipahayag ni Gov. Uy ang iyang suporta sa hinay-hinay nga implementasyon sa programa, samtang andam usab ang BSP sa pagtabang aron masiguro ang hapsay nga pagpatuman niini sa probinsya.(JENNIFER JR. DELICA)
Source: Zamboanga del Norte Provincial News Network