Gatusan ka residente gikan sa Barangays Dansullan, Dangi, ug New Sicayab kaniadtong Agosto 18, ang nakadawat og nagkalain-laing libreng serbisyo atol sa ikatulong hugna sa “Doble Serbisyo sa Barangay Caravan” nga gipahigayon sa Covered Court sa Dansullan.
Gidala mismo ngadto sa mga barangay ang mga serbisyo nga kasagarang makuha sa sentro sa lungsod, nga nagtugot sa mga residente nga makabenepisyo bisan pa sa gilay-on ug mga kalisod sa pagbiyahe.
Kabahin sa mga serbisyong gitanyag ang medical consultation, laboratory services, X-ray, social services, ug legal assistance pinaagi sa Integrated Bar of the Philippines (IBP) Zamboanga del Norte Chapter.
Nakapahimulos usab ang mga residente sa eye consultation, mga binhi ug abono gikan sa Department of Agriculture, deworming sa kahayopan gikan sa Veterinary Office, ug libreng haircut gikan sa 97th Infantry Battalion, Philippine Army.
Alang sa mga kabataan ug pamilya, adunay pag-apod-apod og tsinelas, lugaw, ug food packs, nga dugang nga tabang alang sa mga benepisyaryo sa maong kalihokan.
Ang “Doble Serbisyo sa Barangay Caravan” usa ka programa sa lokal nga pangagamhanan sa Polanco ubos sa administrasyon ni Mayor Ying Uy, nga gipahigayon uban sa suporta sa Provincial Government of Zamboanga del Norte pinaagi sa Kuyog Ta! Medical and Service Caravan ug sa buhatan ni 1st District Congressman Roberto “Pinpin” Uy.
Gipasalamatan ni Mayor Ying Uy ang mga provincial ug national government partners nga mitabang aron mapalapad ang mga serbisyo nga mahatag sa mga residente.
Matud niya, ang programa usa ka pamaagi sa pagpaabot sa serbisyo sa gobyerno ngadto sa mga komunidad, ilabina sa mga residente nga adunay limitadong access sa mga serbisyo tungod sa gilay-on, transportasyon, ug uban pang kahimtang.
Lakip sa nakasinati niini si Estela Ombalino Gallo, 76, taga-Dansullan, nga nagpasalamat nga ang mga serbisyong medikal, dental, ayuda, ug uban pang serbisyo miabot mismo sa ilang barangay.
Si Julius Reyes, 54, taga-Dangi, mipadayag usab sa iyang pasalamat human nakapahimulos ang iyang pamilya sa mga serbisyo nga gitanyag sa caravan.
Samtang si Junah May Ancis, 18, taga-New Sicayab, miingon nga dako ang tabang sa libreng check-up, ilabina tungod sa kalisod sa pag-adto sa tambalanan tungod sa kakulang sa transportasyon.
Gipadayag usab ni Mabel Gomez, 37, usa ka opisyal sa Dansullan, ang iyang pagpasalamat sa pagpahigayon sa kalihokan sa ilang barangay tungod kay daghang residente ang nakadawat og serbisyo ug ayuda.(IKEN B. GULLEM)
Source: Zamboanga del Norte Provincial News Network