Usa ka ₱131.4-milyon nga Farm-to-Market Road (FMR) Project sa Barangay Lintangan, Sibuco, Zamboanga del Norte ang mipadulong na sa sunod nga yugto sa pagpatuman human opisyal nga nadawat sa Provincial Government of Zamboanga del Norte (PGZN) ang No Objection Letter 1 (NOL 1) gikan sa Department of Agriculture–Mindanao Inclusive Agriculture Development Project (DA-MIADP).
Ang maong dokumento naghatag og clearance aron mapadayon ang mga proseso sa procurement ug public bidding, nga gikinahanglan sa dili pa masugdan ang aktuwal nga construction sa proyekto.
Ang proyekto nga “Improvement/Concreting of Sitio Kulibatu (Logdeck) to Sitio Binawing Farm-to-Market Road” adunay Estimated Project Cost (EPC) nga ₱131,413,000.00 ug pondohan pinaagi sa DA-MIADP.
Atol sa turnover ceremony nga gipahigayon sa MIADP Project Support Office sulod sa Philippine Coconut Authority Compound sa Bago Oshiro, Davao City, si Board Member Venus Uy ang midawat sa NOL 1 isip representante ni Governor Darel Dexter T. Uy alang sa PGZN.
Gilauman nga ang pagsemento sa maong farm-to-market road makahatag og dakong kausaban sa pagbiyahe ug pagdala sa mga produkto sa mga mag-uuma ug lumad nga residente sa Barangay Lintangan ug kasikbit nga mga komunidad.
Sa pagkakaron, ang kahimtang sa dalan mahimong hinungdan sa kalisod sa transportasyon, ilabina panahon sa ting-ulan. Pinaagi sa mas lig-on ug konkretong dalan, gilauman nga maminusan ang gasto ug oras sa pagbiyahe ug mas mapadali ang pagdala sa mga ani ngadto sa mga merkado ug sentro sa komersiyo.
Sa higayon nga makompleto, ang proyekto gilauman nga makahatag og mas luwas, mas paspas, ug mas hapsay nga koneksiyon alang sa mga residente ug mag-uuma sa Barangay Lintangan, samtang mapalambo ang pag-access sa mga merkado ug sentro sa pang-ekonomiyang kalihokan.
Lakip sa ubang lokal nga pangagamhanan nga gipasidunggan atol sa maong seremonya mao ang Davao del Sur, Malaybalay City sa Bukidnon, ug San Miguel sa Surigao del Sur.(IKEN B. GULLEM)
Source: Zamboanga del Norte Provincial News Network