Sukad sa paglingkod isip gobernador sa Zamboanga del Norte, usa sa mga unang prayoridad ni Governor Darel Dexter T. Uy ang pagpalig-on sa serbisyong panglawas aron masiguro nga adunay igo ug dekalidad nga pag-atiman alang sa mga residente sa tibuok probinsya.
Gipanguna sa administrasyon ni Gov. Uy ang pag-assess ug pagpaayo sa Zamboanga del Norte Medical Center (ZNMC) ug sa mga district hospitals aron mapalambo ang ilang kapasidad sa pag-atiman sa mga pasyente ug masiguro ang padayon nga paghatag sa gikinahanglang serbisyo panglawas.
Usa sa mga direktang lakang mao ang pagsiguro sa igo nga suplay sa mga tambal, medisina, bitamina, oxygen, medical supplies ug uban pang kagamitan nga gikinahanglan sa adlaw-adlaw nga operasyon sa mga ospital.
Partikular nga gitutukan ang mga botika o pharmacy sa ZNMC ug sa mga district hospitals aron malikayan ang kakulang sa mga tambal nga kasagarang gikinahanglan sa mga pasyente.
Sa pagkakaron, kabug-os sa nagkadaiyang tambal, medisina, bitamina ug uban pang medical supplies ang mga pharmacy sa mga ospital nga gidumala sa Provincial Government.
Tumong niini nga dili na mapugos ang mga pasyente sa pagpangita ug pagpalit sa ilang gikinahanglang medisina sa mga botika sa gawas sa ospital.
Dako usab kini nga tabang alang sa mga indigent ug ubang vulnerable sectors, ilabina sa mga pasyenteng adunay limitado nga pinansyal nga kapasidad. Kadaghanan sa mga tambal ug medisina nga gikinahanglan sa mga kwalipikadong pasyente libre nga gihatag pinaagi sa mga provincial hospitals.
Pinaagi niini, maminusan ang gasto sa mga pasyente ug sa ilang mga pamilya, ilabina sa mga nanginahanglan og padayon nga pag-atiman ug tambal.(IKEN B. GULLEM)
Source: Zamboanga del Norte Provincial News Network