Gipakusog sa nagkadaiyang barangay sa Liloy ang ilang mga lakang batok sa malnutrisyon pinaagi sa Barangay Nutrition Action Plan o BNAP Workshop, nga nagpadayon sa ikaupat nga adlaw, niadtong Septiyembre 7, 2026.
Ang maong workshop gipahigayon pinaagi sa Liloy Digital Transformation Center (DTC) ubos sa pagdumala sa Municipal Nutrition Action Office o MNAO, diin gituki sa mga partisipante ang mga problema sa nutrisyon sa ilang tagsa-tagsa ka barangay ug nagporma og mga konkretong lakang aron matubag kini.
Gipasiugda sa kalihokan nga ang panaghiusa sa barangay ug lokal nga panggamhanan importante aron mas mapalig-on ang mga programa sa nutrisyon ug masiguro ang mas himsog nga kahimtang sa mga pamilya.
Gilauman nga mahuman ang workshop sa sunod nga adlaw, diin dad-on sa mga partisipante ang ilang mga nahisgotan ug naplanong aksyon ngadto sa aktuwal nga pagpatuman niini sa matag barangay.(MEDALYN U. BORJA)
Source: Liloy Digital Transformation Center- LDTC