Gipakusog sa Bureau of Jail Management and Penology (BJMP) Zamboanga del Norte ang koordinasyon uban sa nagkadaiyang ahensya sa gobyerno atol sa pagsalmot niini sa 3rd Quarter Joint Provincial Peace and Order Council (PPOC), Provincial Anti-Drug Abuse Council (PADAC), ug Provincial Development Council (PDC) Meeting niadtong Septiyembre 9, 2026 nga gipahigayon sa Plenary Hall sa Zamboanga del Norte Convention and Exhibition Center sa Dipolog City, ug gitambongan sa mga representante sa nagkalain-laing ahensya ug stakeholders nga nalambigit sa pagpalig-on sa kalinaw, seguridad ug kalamboan sa probinsya.
Ang pagsalmot sa mga kawani sa BJMP girepresentahan pinaagi sa Provincial Jail Administrator’s Office (PJAO) Zamboanga del Norte ubos sa pagpangulo ni JCSUPT Amado A. Concepcion Jr., Regional Director sa Jail Bureau, ug JSSUPT Abner C. Zamora, Assistant Regional Director for Administration ug concurrent Provincial Jail Administrator. Mitambong isip representante si JCINSP Jonathan N. Arawangsa.
Kabahin sa mga gihisgutan mao ang mga nahimo ug mga kalihukan sa PPOC ug PADAC alang sa ikatulong quarter, nga gipresentahan ni JO1 Riena Mae A. Pingkian.
Gipunting sa panagtigom ang nagkalain-laing programa ug interbensyon nga gitumong sa pagmintinar sa peace and order, pagpanalipod sa katawhan, ug pagpalig-on sa kampanya batok iligal nga droga sa Zamboanga del Norte.
Gihatagan usab niini og gibug-aton sa tigom ang panginahanglan sa padayong panaghiusa sa mga ahensya sa gobyerno ug mga sektor sa komunidad aron mas epektibong matubag ang mga isyu sa kalinaw, seguridad ug kalamboan.
Gipasalig sa BJMP-Zamboanga del Norte ang padayon nga pakigtambayayong niini sa inter agency initiatives aron makatampo sa pagtukod sa mas luwas, malinawon ug progresibong probinsya.(MEDALYN U. BORJA)
Source: BJMP IX Provincial Administrator’s Office- Zamboanga del Norte