Nagpahigayon og fire drill ug Fire Safety Lecture ang mga personnel sa Sindangan Central Fire Station sa VITAWELL Dialysis Center sa Sindangan kagahapon, Hunyo 29, 2026 aron mapalig-on ang kahibalo ug kahandam sa mga empleyado batok sa sunog.
Atol sa lecture, gipasabtan sa BFP ang mga empleyado bahin sa kasagarang hinungdan sa sunog sa mga establisemento, hustong housekeeping, electrical safety, ug kahinungdanon sa pagmintinar sa naglihok nga fire protection equipment. Gitudloan usab sila sa husto nga paggamit sa fire extinguisher pinaagi sa T-PASS technique ug sa angay nga buhaton panahon sa emerhensiya.
Human sa lecture, gipahigayon ang usa ka full-scale fire drill aron masulayan ang emergency response plan sa establisemento. Hapsay nga mibakwit ang mga empleyado padulong sa gitudlong assembly area samtang gibantayan sa mga bombero ang ilang response time ug pagsunod sa mga safety protocol.
Lakip usab sa kalihokan ang praktikal nga demonstrasyon sa batakang firefighting techniques ug hustong koordinasyon panahon sa emerhensiya. Sumala sa BFP, kabahin kini sa ilang padayon nga kampanya aron masiguro nga andam ang mga establisemento ug komunidad sa pag-atubang sa mga insidente sa sunog.(JENIFFER JR. DELICA)
Source: BFP R9 Sindangan Municipal Fire Station v2