Gipahigayon sa mga bombero sa Labason ang usa ka Physical Fitness Activity aron palig-onon ang ilang lawasnon nga kahimtangan ug kahandam sa operasyon. Ang kalihukan gipangunahan ni FINSP Joel S. Sabijon, Acting Municipal Fire Marshal.
Gibuhat ang kalihukan sulod ug palibot sa Labason Fire Station, diin miapil ang mga personnel sa nagkalain-laing pisikal nga ehersisyo sama sa endurance run, hose carry, sit-ups, ug push-ups. Gitumong niini ang pagpalambo sa kusog ug stamina sa matag bombero.
Ang maong mga ehersisyo naghulad sa aktuwal nga kahimtangan nga ilang maatubang panahon sa mga emerhensiya, ilabina sa sunog ug rescue operations. Pinaagi niini, mas mapaligon ang ilang abilidad sa paghatag og paspas ug episyenteng serbisyo sa komunidad.
Ang kalihukan nagpakita sa padayong paningkamot sa Bureau of Fire Protection sa Labason sa pagmintinar sa disiplina, kahimsog, ug kahandam sa ilang hanay alang sa kaluwasan sa katawhan.(JENIFFER JR. DELICA)
Source: BFP R9 Labason Fire Station