Nagpatuman og house-to-house survey ang Bureau of Fire Protection Dapitan City Fire Station sa Barangay Liyang, Dapitan City, isip kabahin sa Oplan Ligtas na Pamayanan niadtong Disyembre 29, 2025.
Gipangunahan kini ni Acting City Fire Marshal FSINSP Rommel M Rojas, R E E, aron masuta ang kahimtangan sa kahandam sa matag panimalay batok sunog ug mapalig-on ang kahibalo sa komunidad sa fire safety. Apil sa kalihokan ang pagpanudlo sa hustong mga buhaton aron malikayan ang sunog.
Gipanghatagan usab og Exit Drill in the Home o EDITH leaflets ang mga residente aron matabangan silang maghimo ug praktis sa ilang emergency escape plan. Padayon ang BFP Dapitan City sa pagpalig-on sa kahandam ug kaluwasan sa komunidad pinaagi sa aktibong pakigduol sa katawhan.(JENIFFER JR. DELICA)
Photo Courtesy: BFP R9 Dapitan City Fire Station