Ang Bureau of Fire Protection (BFP) Dapitan nagpahigayon og Fire Safety Orientation ug Fire Drill kauban ang mga estudyante ug magtutudlo sa Potungan National High School niadtong Agosto 23, 2025.
Ang kalihokan gipangulohan ni FSINSP Aprilyn B. Barbazo, JD, Acting City Fire Marshal, uban ang mga personahe sa Dapitan City Fire Station, nga gitabangan usab sa ubang ahensya sa seguridad ug kahapsay.
Lakip sa gipatuman ang pagtudlo bahin sa fire safety awareness, lakang sa pagpangandam batok kalayo ug linog, ug ang husto nga paagi sa pag-evacuate kon adunay emerhensiya. Human sa lecture, gipahigayon usab ang simulation drill aron masanay ang mga estudyante ug teaching personnel sa pagresponde sa emerhensiya sa hapsay ug luwas nga paagi.
Nagpasalamat usab ang BFP sa administrasyon sa Potungan National High School tungod sa ilang pagsalig ug pakigtambayayong sa ahensya, isip kauban sa pagpalig-on sa kaluwasan ug kahandaman sa komunidad.
Gipahinumdoman usab sa BFP ang tanan nga ang kaluwasan nagsugod sa kahibalo, ug ang kahandaman sa komunidad kinahanglan unang ipatuman sa mga tunghaan aron mahimong modelo sa pag-atubang sa mga emerhensiya.(Jumalisa Papa)
Source: BFP R9 DAPITAN CITY FIRE STATION