Giturn-over sa Bureau of Fisheries and Aquatic Resources (BFAR) IX ug sa Provincial Fisheries Office ang P13.5 milyon nga mga Seaweed Farm Implements ug Interventions atol sa seremonya nga gipahigayon sa Sindangan People’s Cultural and Sports Center, kaniadtong Oktubre 28, 2025.
Ang mga gihatag naglakip sa 350 sets sa seaweed farm implements nga nagkantidad ug P8.3 milyon alang sa indibidwal nga benepisyaryo ug lima ka modyul sa deep-sea seaweed nursery nga mikantidad og P5.2 milyon alang sa mga grupo nga benepisyaryo.
Ang proyekto ubos sa Enhanced Philippine Seaweed Development Program (EPSDP) nagtinguha sa pagpalig-on sa industriya sa seaweed, pagpadako sa produksyon, ug paghatag ug dugang oportunidad sa mga coastal communities aron makunhuran ang kakabus.
Matud pa ni BFAR IX Regional Director Al-Zath Kunting, pinakadakong alokasyon sa tibuok rehiyon ang nadawat sa Zamboanga del Norte, diin napili ang Sindangan, Jose Dalman, Rizal, ug Sibutad isip benepisyaryong munisipalidad.
Sa mensahe usab ni Gov. Darel Dexter Uy nga gipahat ni PIO Rosemarie Miranda, iyang gibug-atan ang papel sa One Stop Assistance Center (OSAC) sa koordinasyon sa mga ahensya sama sa BFAR aron mapaligon ang mga programa sa panginabuhian sa lalawigan.
Samtang, si Cong. Irene G. Labadlabad ug SB Member Rainier Maningo, mipasidungog sa mga seaweed farmers, nga ilang gihulagway nga haligi sa lokal nga ekonomiya ug pwersa sa paglambo sa probinsya.(IKEN B. GULLEM)