Nagsugod na sa ilang Supervised Field Work ang upat ka Batch 60 Local Government Operations Officer o LGOO II apprentices sa Department of the Interior and Local Government o DILG Zamboanga del Norte isip kabahin sa ilang apprenticeship program.
Sa unang semana sa ilang field immersion, mihimo ang mga apprentice og courtesy call kang Governor Darrel Dexter T. Uy, mipresentar sa ilang Individual ug Team Action Plans, mipaambit sa orientation kabahin sa operasyon sa Provincial Office, ug mipahimutang sa ilang temporaryong kapuy-an.
Tumong sa maong programa ang paghatag sa mga apprentice og aktuwal nga kasinatian sa lokal nga panggamhanan aron mapalambo ang ilang teknikal nga kahibalo ug maandam sila sa ilang tahas isip umaabot nga mga Local Government Operations Officer.
Giabiabi sa DILG Zamboanga del Norte ang mga apprentice ug gipadayag ang suporta sa ahensya aron mahimong mabungahon ang ilang pagbansay ug mapalig-on ang ilang dedikasyon sa maayong pangagamhanan ug serbisyo publiko.(JENIFFER JR. DELICA)
Source: DILG Zamboanga del Norte