Magpadayon karon, Hulyo 15, 2026 ang ikaduhang adlaw sa KADIWA ng Pangulo didto sa Eco Park sa Upper Turno, Dipolog City, diin padayon nga gihatagan og higayon ang katawhan sa pagpalit og mga lokal nga produkto sa mas mabaratong presyo samtang gisuportahan ang panginabuhian sa mga mag-uuma, mananagat, ug gagmay’ng negosyante.
Human sa unang adlaw sa kalihokan niadtong Hulyo 14, nagpadayon ang KADIWA sa paghatag og nagkalain-laing palaliton, lakip ang P20 nga bugas, preskong prutas ug utanon, mga produktong gikan sa kadagatan, bag-ong ani nga mga produktong pang-agrikultura, ug uban pang lokal nga baligya gikan sa mga prodyuser sa Dipolog City ug kasikbit nga mga lugar.
Ang maong duha ka adlaw nga kalihokan kabahin sa programa sa gobyerno nga nagtumong sa pagdugtong sa mga prodyuser ug konsumidor aron direkta nga mabaligya ang ilang mga produkto. Pinaagi niini, makapalit ang publiko sa mas ubos nga presyo samtang makadawat og patas nga kita ang mga mag-uuma ug mananagat.
Abli ang KADIWA ng Pangulo gikan sa alas-8:00 sa buntag hangtod alas-3:00 sa hapon karon, Hulyo 15, nga mao ang katapusang adlaw sa maong kalihokan.(IKEN B. GULLEM)
Source: Zamboanga del Norte Provincial News Network