Gibuksan sa Barangay Siparok ang bag-ong barangay hall nga nagkantidad ug ₱1.5 milyon atol sa pagsaulog sa ika-31 nga anibersaryo niini nga nagdala sa temang “Padayon sa Panaghiusa alang sa Dugang Kalamboan sa Barangay Siparok” nga gipahigayon sa Covered Court brgy. Siparok, Jose Dalman, Zamboanga del Norte, kaniadtong Oktubre 20, 2025.
Ang proyekto gipatuman pinaagi sa 20% Local Government Unit Economic Development Fund ug gipasiugdahan sa turn-over ug ribbon cutting ceremony nga gipangulohan sa lokal nga mga opisyal.
Sa mensahe ni Gobernador Darel Dexter Uy nga gipahatod ni Provincial Information Officer Rosemarie Miranda, iyang gipasabot nga ang proyekto usa ka pruweba sa KUYOG TA sa Bag-ong ZANORTE Agenda, nga nagpunting sa maayong panglawas, edukasyon, ug kalidad nga serbisyo sa mga katawhan.
Gipasabot usab nga ang One Stop Assistance Center (OSAC) diin makita sa buhatan sa Kapitolyo, magpadayon sa paghatag sa nagkadaiyang serbisyo sama sa medikal nga tabang, legal, programa sa iskolar alang sa mga kabataan ug uban pa.
Si Mayor Allen T. Ferrater sa Jose Dalman, sa iyang bahin, nag-awhag sa mga residente sa Siparok nga ipadayon ang panaghiusa ug kooperasyon aron mas mapalambo ang ilang barangay.
Gisuportahan usab ni Vice Mayor Julieta Macapaz ang maong inisyatibo ug mipadayag sa iyang paglaum nga magpadayon ang kalambuan sa barangay. Samtang, magpadayon ang mga kalihokan hangtud Oktubre 26 isip simbolo sa lig-on nga panaghiusa ug pagtinabangay sa komunidad.(Iken B. Gullem)
Source: Zamboanga del Norte Provincial News Network