Mibisita sa buhatan ni Governor Darel Dexter T. Uy ang bag-ong Battalion Commander sa 97th Infantry Battalion, LtCol. Jessie G. Bergonia,lumad sa Zamboanga del Sur, ug bag-o lang mihulip kang LtCol. Jimmy T. Sanz isip commanding officer alang sa usa ka courtesy call Kauban si 1Lt. Elham A. Sirajan, Civil-Military Operations Officer sa 97th IB, kaniadtong Nobyembre 17, 2025.
Nahisgutan sa miting ang Former Rebel Summit nga ipahigayon sa Disyembre sa Pagadian City, nga nagtinguha sa capacity building ug livelihood programs alang sa mga former rebels (FRs) nga mibalik sa gobyerno. Sa pagkakaron, 34 ka organisasyon sa FRs ang giya sa 97th IB ug nagpuyo na nga malinawon sa lain-laing komunidad sa probinsya.
Gipadayag ni Gov. Uy ang pag-apil sa kalihokan sa Enhanced Gasang Bahandianon sa Umahan (EGBU) aron matabangan ang FRs sa ilang panginabuhian, lakip ang pagtuon sa bag-ong pamaagi sa pagpanguma sa utanon ug hustong pagdumala sa kwarta. Gipahibalo usab ni LtCol. Bergonia ang 50,000 ka abaca seedlings nga ihatag sa mga FRs sa lungsod sa Sirawai, nga anaa na sa 10,000 ka seedlings ang napamahagi.
Nahisgutan usab ang Youth Leadership Summit (YLS) sa sunod tuig, diin gisugyot ni Gov. Uy nga apilon ang PSWDO ug AFP Reservists para sa suporta sa kabatan-onan. Gi-tutokan usab ang livelihood program sa kasundalohan nga nagtumong sa paghatag ug tugbang panginabuhian base sa kalidad sa armas nga gisurender, aron mapugngan ang pagdaghan sa armas nga magamit sa dautang katuyuan.
Gisugyot ni Gov. Uy nga kontrahon usab ang mga disinformation gikan sa kaatbang aron mapalig-on ang kalinaw ug kaangayan sa matag komunidad sa Zamboanga del Norte.(IKEN B. GULLEM)
Source: Zamboanga del Norte Provincial News Network