Labaw sa tanang 14 ka kontendors gikan sa lain-laing tunghaan sa Zamboanga del Norte, si Lou-Rain Grace Aellieah P. Bartonico sa Jose Rizal Memorial State University – Katipunan Campus ang mipatigbabaw ug nakadaug sa kampeonato sa “Estadistika sa Bawat Taludtod: Ikatlong Yugto,” usa ka interschool spoken poetry contest nga gipahigayon sa Philippine Statistics Authority – Zamboanga del Norte Provincial Statistical Office.
Ang maong pasidungog iyang nailakip pinaagi sa iyang obra “Ayaw Mong Makita,” nga gihimo atol sa Closing Program sa ika 36th National Statistics Month (NSM) ubos sa temang “Accelerating the Sustainable Development Goals (SDG) Pace of Progress: Mobilizing Data for All,” niadtong Oktubre 27, 2025, sa The West End Court Hotel, Barangay Miputak, Dipolog City.
Gipadayag sa PSA-ZDN nga ang kalampusan ni Bartonico nagpamatuod sa katakus, pagkamamugnaon, ug gahum sa sining sa kabatan-onan sa pagpasabot sa kahinungdanon sa estadistika pinaagi sa mga pulong ug taludtod.
Ang “Estadistika sa Bawat Taludtod” usa ka poetry slam competition nga gikatuyo aron mapauswag ang kahibalo ug pagpasabot sa estadistika isip galamiton sa kalamboan sa katilingban.(IKEN B. GULLEM)