Tumang kalipay ang gibati karon sa kagamhanang probinsyal sa Zamboanga del Norte human giaprubahan sa Regional Project Advisory Board (RPAB) ang Rehabilitation/Concreting of Lanawan-Tambalang-Balakan-Salug-Sarawagan -Raba, Godod Farm to Market Road (Segment 1) ug Dipopor-Poblacion Godod Farm to Market Road sa kantidad nga Php455,526,726.00 milyones ug adunay gitas-on nga 17.977 kilometro.
Kini atul sa RPAB Deliberation nga gipanguluhan ni Engr. Marcos C. Aves, Sr. Project Director ug RPAB Chairman nga gipahigayon sa Conference Room, DA Regional Field Office IX, Lenienza, Pagadian City, Pebrero 19 niining tuiga.
Kining maong proyekto punduhan sa Department of Agriculture Phillippine Rural Development Project (DA-PRDP) ug World Bank ug sa kagamhanang probinsyal. Ang Provincial Project Management Implementation Unit (PPMIU) sa Zamboanga del Norte nga gipanguluhan ni Acting Provincial Administrator ug SES Head Levy Lagutin maoy mi presentar sa maong proyekto ngadto sa RPAB ug giaprubahan gilayon kini.
Sa pagkighinabi ni Mr. Lagutin siya namahayag nga human niini aduna na dayon sunod-sunod nga pag-review sa mga dokumento sa Regional Project Coordination Office (RPCO) sa lungsod sa Ipil, Davao ug hangtud na sa National Project Coordination Unit sa PRDP sa kauluhang Manila. Dugang ni Mr. Lagutin nga kini usa sa prioridad nga proyekto ni Governor Jalosjos ug nanghinaut siya nga sa dili madugay mapatuman na gilayon kini human sa pagproseso sa mga dokumento.
Base sa datus nga gipresentar sa PPMIU nasayran nga mapahimsulan unya ang maong proyekto sa 2,136 ka bubong sa lungsod sa Salug ug Godod diin 1,735 niini ang farming households ug adunay 3,178 ka mga mag-uuma dinhi. Samtang adunay 3,965 ka Indigenous People ug Non-IP ang makapahimulos unya ning maong proyekto. Lakip sa nanag-uunang produkto sa umahan sa maong dapit nga mahatud sa kamerkaduhan mao ang goma, kopra, mais, humay ug uban pang lagutmon.
Nasayran nga ang PRDP gidesinyo aron motabang sa pagkab-ot sa mga nasudnon nga tumong sa inklusibong pag-uswag, paghimo ug trabaho ug pagkunhod sa kapobrehon.(Angelica T. Obina)
SOURCE: 𝙋𝙄𝘾- 𝙎𝙝𝙚𝙣𝙜 𝙅𝙪𝙢𝙖𝙡𝙤𝙣 𝘽𝙖𝙡𝙖-𝙉𝙚𝙬𝙨𝙬𝙧𝙞𝙩𝙚𝙧