Dakong tabang ngadto sa mga mag-uuma ang gilauman niini nga pagsaka sa produktibidad sa abaka sa Godod, human madawat sa lokal nga pangagamhanan ang usa ka Abaca Spindle Stripping Machine niadtong Setyembre 10, 2026.
Pormal nga giturn-over ang kagamitan ni PFC James B. Zia, Civil-Military Operations Non-Commissioned Officer sa Bravo Company, 97th Infantry Battalion, 1st Infantry Division, Philippine Army, ngadto kang Mayor Richie Uy.
Ang makinarya gipaabot nga makatabang sa pagpasayon ug pagpadali sa pagproseso sa abaka, ilabina sa mga mag-uuma nga nagsalig niini isip panginabuhian.
Nakuha ang maong suporta pinaagi sa inisyatiba ni Congressman Adrian Michael Amatong, uban sa pakigtambayayong sa Department of Agriculture Philippine Fiber Industry Development Authority (DA-PHILFIDA).
Gitan-aw sa lokal nga pangagamhanan ang proyekto isip dugang nga suporta sa pagpalambo sa abaka industry sa lungsod, samtang nagtinguha usab nga mapalambo ang kita ug oportunidad sa panginabuhi sa mga mag-uuma.
Nagpasalamat ang LGU-Godod sa mga ahensya ug opisyal nga mitampo sa paghatag sa maong kagamitan isip bahin sa padayong paningkamot sa pagpalig-on sa sektor sa agrikultura sa lungsod.(MEDALYN U. BORJA)
Source: Godod Zamboanga del Norte