BALIGUIAN, ZAMBOANGA DEL NORTE — 94 ka bag-ong pusa sa Hawksbill Turtle (Eretmochelys imbricata) ang luwas nga gibuhian sa baybayon sa Barangay Mamad niadtong Pebrero 22, 2026, ubos sa pagdumala sa Community Environment and Natural Resources Office (CENRO) Siocon.
Naaksyonan dayon sa CENRO Siocon ang report nga ilang nadawat niadtong Pebrero 21 mahitungod sa paglitaw sa mga piso sa pawikan sa maong dapit. Nakigkoordinar sila sa Municipal Environment and Natural Resources Office sa Baliguian aron himuon ang beripikasyon ug pag-assess sa lugar. Human mailhan pinaagi sa ilang pisikal nga kinaiyahan ug madokumento, maampingong giagak ang mga piso paingon sa dagat subay sa giya sa wildlife conservation.
Ang Hawksbill Turtle giila nga “critically endangered” sumala sa DENR Administrative Order No. 2019-09 ug ginapanalipdan ubos sa Republic Act No. 9147 nga nagdili sa ilegal nga pagpatay, pagpanguha ug pagbaligya sa wildlife.
Gipasidunggan sa CENRO Siocon ang kusog nga panaghiusa sa mga ahensya sa gobyerno ug komunidad sa pagpanalipod sa kinaiyahan, samtang nag-awhag sa publiko nga dayong ireport ang bisan unsang pagpangitlog o pagpisô sa pawikan aron masiguro ang padayon nilang pagkinabuhi sa umaabot nga mga henerasyon.(JENIFFER JR. DELICA)
Source: DENR Zamboanga Peninsula