Adunay 80 ka mga partisipante sa Training of Trainers (TOT) on Barangay Drug Clearing Program (BDCP) Implementation nga gipahigayon sa Gloria de Dapitan, dakbayan sa Dapitan, Oktubre 8-9, niining tuiga. Kini gipasiugdahan sa Philippine Drug Enforcement Agency (PDEA), Department of the Interior and Local Government (DILG) ug sa kagamhanang probinsyal sa Zamboanga del Norte.
Kini gitambungan sa DILG Officers, PNP, Municipal/City Health Officers gikan sa duha ka dakbayan sa Dipolog ug Dapitan ug sa 14 ka lungsod.
Si Provincial Officer Ariel Escudero sa PDEA Zamboanga del Norte nga ang maong kalihukan nagtumong aron mabaid ang kahibalo ug abilidad sa mga lumilihok sa barangay drug clearing program aron makatrabaho sila ug maayo alang sa munisipyo ug barangay.
Sa mensahe usab ni Governor Rosalina “Nanay Nene” Jalosjos nga gi-representahan ni Atty. Ryan Maglangit, kini ang mipaabot sa iyang pagdayeg ug pagpasalamat ngadto sa rehiyonal nga buhatan sa PDEA sa pagpahigayon sa maong kalihukan.
Dugang sa mensahe ni Governor Jalosjos nga ang pagpakigbatok sa illegal nga druga maoy usa sa prioridad niining iyang administrasyon.
Atul usab sa Press Conference, si PDEA 9 Regional Director Maharani Gadaoni-Tosoc ang midayeg sa ka aktibo sa drug clearing program sa Zamboanga del Norte kumpara sa ubang probinsya sa Zamboanga Peninsula sanglit sulod sa 691 ka barangay dinhi, aduna na lamay 59 ka barangay ang drug-affected barangays pa.
Dugang sa maong regional director nga bisan paman daghan na ang drug-free and drug-cleared barangays sa probinsya, kinahanglan pa kining subayon sanglit sa ilang na-obserbahan aduna pay mibalik sa maong bisyo.
Si PCol Rainier Diaz, Provinical Director sa Zamboanga del Norte Police Provincial Office ang malaumon nga mamahimong usa ka drug-free province ang Zamboanga del Norte gumikan sa pagtinabangay sa komunidad ug ilabi na pinaagi usab ning maong bansay-bansay.
Ang Training of Trainers hingpit usab gisuportahan sa probinsyal nga buhatan sa DILG pinaagi ni Provincial Director Oliver Ombos. Siya usab nagkanayon nga kinahanglan mapalig-on ang Barangay Anti-Drug Abuse Council aron masustenir ang Barangay Drug-Clearing Program.
Sa Oktubre 10-11, ipahigayon na usab ang second batch sa maong kalihukan sa susamang lugar. (Angelica T. Obina)
(Source: Sheng Jumalon Bala – PIC ZaNorte)