Gilibkas na ang quarantine sa Bantay ASF nga nasulod sa 500-meter radius sa Brgy. Sta. Isabel ning dakbayan sugod kagahapon, Disyembre 23 ning tuiga.
Kini human nag-negatibo ang resulta sa 74 ka mga blood samples sa mga baboy nga gipadala ngadto sa Bureau of Animal Industry-Animal Disease Diagnostic and Reference Laboratory sa kaulohang Manila alang sa confirmatory testing gikan sa nahisgutan nga dapit.
Alayon ning kalamboan, gipahibalo karon sa lokal nga buhatan sa Agrikultura ning dakbayan pinaagi ni City Agriculturist, Engr. Kerr N. Porlas, nga back- to- normal na ang operasyon sa mga negosyo sa baboy dinhi sa atong dakbayan, gawas lamang sa duha ka mga litsonan diin didto unang nasayrang nag-positibo ang upat ka baboy niadtong Disyembre 15 ug gisundan sa laing usa niadtong petsa 17.
Dugang ni Porlas, nga ang duha ka litsonan ang gipa-ilawom pa karon sa 60-day “disinfection period” aron hingpit nga mawagtang ang virus nga maoy naka-ingon ning nasangpit nga sakit ug sulod ning panahona, dili pwedeng maglitson dinha sa maong area ang hingtungdan.
Samtang sa laing bahin, gipanawagan usab ni City Veterinarian, Dr. Imelda Villacrusis ngadto sa tanan nga magpabilin gihapon kitang magmabinantayon batok sa ASF, ipatuman ang striktong biosecurity measures dinha sa mga piggery dinhi palibot sa dakbayan, uban sa hingpit nga pag-discourage sa “swill feeding” kon pagpakaon og pasaw sa baboy tungod kay usa kini sa mga hinungdan nga magdaot ang baboy ug gitohuang maoy usa sa tinubdan sa African Swine Fever.
(Source: Dipolog City Government Facebook page)