Adunay 51 ka Father Volunteers ug Focal Person sa Empowerment and Reaffirmation Paternal Abilities (ERPAT) sa matag lungsod ang mitambong sa Trainer’s Training in the Implementation of the Family Drug Abuse Prevention Program (FDAPP) in the Province of Zamboanga del Norte, Agosto 15-16, niining tuiga nga gipahigayon sulod sa Chow Bai Restaurant, Gloria Fantasy Land, dakbayan sa Dapitan.
Kini gipasiugdahan sa kagamhanang probinsyal sa Zamboanga del Norte pinaagi sa Provincial Social Welfare and Development Office (PSWDO) nga nagdala sa tema “Building Strong Foundations-Empowering Fathers to Safeguard Their Families”.
Sa mensahe ni Mr. Alex Sabal, OIC sa PSWDO, iyang gipaklaro nga ang mga partsipante sa maong training maoy responable na usab sa pagpa-ambit sa ilang nahibal-an ngadto sa family volunteers sa ilang lugar.
Gihatagan ug gibug-aton ni Mr. Sabal ang kalabot sa Republic Act Number 9165 o ang Comprehensive Dangerous Drugs Act of 2002 nga ang mga amahan adunay importanteng papel sa ilang pamilya isip maoy basic unit sa katilingban alang na sa pag-giya kanila.
Samtang sa mensahe ni Governor Rosalina “Nanay Nene” Jalosjos nga gipabati usab ni Mr. Sabal, kini nagkanayon nga ang pamilya maoy pundasyon sa katilingban ug ilang tahas sa pagseguro ning maong pundasyon nga mamahimong lig-on.
Giawhag usab ni Governor “Nanay Nene” ang mga paritisipante magtinabangay aron mapakgang ang pagpayuhot sa ginadiling druga sa probinsya diin maoy dakong hulga sa pamilya.
Gipasalig sa inahan sa probinsya nga ihatag niya ang tiunay nga serbisyo kutob sa iyang mahimo alang sa katawhan diin lakip na niini ang pagproteher sa pamilya sa Zamboanga del Norte subay sa iyang panultihon “Misyon ko, Tinuod nga Serbisyo”.
Lakip sa gituki sa maong training mao ang Statistical Implications of the Proliferation of Dangerous Drugs in the Province of Zamboanga del Norte by City/Municipality since 2021 up to the present ni PCapt Charlot Lapiz sa Zamboanga del Norte Police Provincial Office (ZNPPO); The Role of PDEA as the Lead Agency in the Fight Against Drug Abuse and Trafficking and Awareness on the Different Dangerous Drugs ni Agent Ariel Escudero, Provincial Officer-PDEA Zamboanga del Norte; Ill Effects of Dangerous Drugs and Preventive Measures of the Family in the Home and Community ni Dr. Eduardo Luayon, Provincial Health Officer; An Overview of the Family Drug Abuse Prevention Program (FDAPP) and the Yakap Bayan Program of the DSWD ni Ms. Raiza Palarca-Cabale ug ang Understanding the Facilitation of Adult Learning on Family Drug Abuse Prevention Program (FDAPP) ni Mr. Norbert Solina parehong gikan sa Department of Social Welfare and Development (DSWD) Field Office 9 sa dakbayan sa Zamboanga. (PIC-Sheng Jumalon Bala)