Nakab-ot sa Coast Guard Station (CGS) Zamboanga del Norte ang mahinungdanong suporta human sa ilang pag-apil sa 4th Quarter meetings sa Provincial Peace and Order Council (PPOC), Provincial Anti-Drug Abuse Council (PADAC), ug Provincial Disaster Risk Reduction and Management Council (PDRRMC) nga gihimo niadtong nilabay nga adlaw.
Gipangunahan ang representasyon sa CGS Zamboanga del Norte ni Lieutenant Junior Grade (LTJG) Sonny Philip E. Habal sa Philippine Coast Guard (PCG), uban ang iyang Deputy Commander nga si Ensign (ENS) Mark Kevin O. Periera, PCG.
Sa panagtigom, gitutokan ang pagpalig-on sa kalinaw ug kahusay sa probinsya, kampanya batok ilegal nga droga, ug pagpaayo sa disaster preparedness ug response. Usa sa dakong resulta sa miting mao ang pag-apruba sa paglakip sa badyet alang sa pagpalit ug land ug water assets sa Coast Guard, lakip ang suporta para sa Coast Guard K9 (Canine Unit) Narcotics and Detection Dog nga gamiton sa joint anti-illegal drugs operations.
Gipahayag sa CGS Zamboanga del Norte nga magpadayon sila sa aktibong pakigtambayayong sa lokal nga pangagamhanan ug ubang ahensya aron mapalig-on ang seguridad, kaluwasan, ug kaayohan sa mga coastal ug inland nga komunidad sa Zamboanga del Norte.(IKEN B. GULLEM)
Source: Coast Guard Station Zamboanga del Norte