Gipalig-on ang kahibalo ug kahanas sa mga 4Ps Parent Leaders sa Dapitan City pinaagi sa Seminar-Orientation nga gipahigayon sa Department of Social Welfare and Development (DSWD) Field Office IX, pinaagi sa Pantawid Pamilyang Pilipino Program (4Ps), sa pakigtambayayong sa City Social Welfare and Development Office (CSWDO) niadtong Setyembre 22, 2026, sa DCGEA-MPC Hall.
Gitutokan sa kalihokan ang pagpangulo, self-awareness, community advocacy, ug entrepreneurship aron mas maandam ang mga Parent Leaders sa ilang responsibilidad isip mga representante sa mga benepisyaryo sa ilang mga barangay.
Gihatagan usab sila og impormasyon bahin sa mga social welfare programs ug support services nga anaa alang sa mga pamilya. Gipresentar kini sa mga resource speakers sa CSWDO nga sila Rosalie M. Pobadora, Joy Marie P. Villas, ug Janice O. Bencilla.
Gihisgutan usab ang livelihood development ug economic empowerment aron mahibal-an sa mga partisipante ang mga oportunidad nga makatabang sa pagpalambo sa panginabuhian sa mga pamilya. Gitudloan usab sila sa mga batakang konsepto sa Disaster Risk Reduction and Management (DRRM) aron mas maandam ang ilang mga komunidad sa mga kalamidad ug emerhensiya.
Kabahin sa kalihokan ang Federated Pantawid Election diin napili si Ms. Desiree S. Bulay-og sa Barangay Dawo isip bag-ong presidente sa Dapitan City 4Ps Parent Leaders Association alang sa 2026–2029 nga termino.(IKEN B. GULLEM)
Source: Dapitan City Government