Nakadawat og libreng medical ug dental services ang 343 ka residente sa Barangay Poblacion pinaagi sa “Kuyog Ta Medikal ug Serbisyo Caravan” ubos sa Ayuda Medikal Plus sa Provincial Government of Zamboanga del Norte niadtong Setyembre 22, 2026.
Sa maong ihap, 220 ka residente ang nakabenepisyo sa medical consultation samtang 123 ang nakadawat og dental services. Gipahigayon ang caravan isip kabahin sa ika-44 nga kasumaran sa Barangay Poblacion nga adunay temang “Sama-Sama Para sa Mas Maunlad na Poblacion!”
Gipasalamatan ni Barangay Captain Cherrylyn L. Guimalan ang provincial government tungod sa pag-aprobar sa ilang hangyo nga ipahigayon ang medical ug dental caravan sa barangay. Matud niya, dako kini nga tabang sa mga residente nga nanginahanglan og konsultasyon ug tambal.
Gipasiugda usab ni Executive Assistant IV Imelda C. Endab ang pagdala sa mga serbisyo sa gobyerno direkta ngadto sa mga komunidad, ilabina sa mga lugar nga layo sa sentro sa serbisyo.
Lakip sa mga residente nga nakabenepisyo mao si Ronel F. Rendon, 40 anyos, taga-Barangay Delusom, ug Erlinda P. Jamora, 72 anyos, taga-Barangay Poblacion. Sila nagpacheck-up alang sa ilang mga balatian ug nakadawat og libreng konsultasyon ug tambal.
Pinaagi sa “Kuyog Ta Medikal ug Serbisyo Caravan,” padayon nga gipaduol sa Provincial Government of Zamboanga del Norte ang mga serbisyo sa panglawas ngadto sa mga barangay aron mas daghang residente ang maka-access sa basic medical ug dental care.(IKEN B. GULLEM)
Source: Zamboanga del Norte Provincial News Network