Arestado ang usa ka 44 anyos nga street level individual sa gipahigayon nga joint buy-bust operation sa mga operatiba mga alas 11:30 sa gabii niadtong Oktubre 26, 2025,didto sa Poblacion South, Piñan, Zambonga del Norte.
Ang dinakpan nga suspek naila nga usa ka 44-anyos nga lalaki, negusyante, naila nga Street-Level Individual (SLI) sa susamang lugar kinsa gisikop sa mga operatiba sa Piñan Municipal Police Station uban sa Zamboanga del Norte Provincial Drug Enforcement Unit, 901st Regional Mobile Force Battalion 9, ug Zamboanga del Norte Provincial Intelligence Unit.
Nasakmit atol sa operasyon ang usa (1) ka heat-sealed transparent plastic sachet nga adunay sulod nga gidudahang shabu nga motimbang og gibana-bana nga 0.8 gramos (buy-bust item) ug upat (4) ka dugang nga sachet nga adunay gibana-bana nga 0.7 gramos (possession), nga adunay kinatibuk-ang gibug-aton nga 1.5 gramos ug ang standard nga presyo sa droga nga P10,200.00.
Narekober usab ang usa (1) ka P500 bill nga gigamit isip buy-bust money, dose (12) ka sinsilyo sa nagkadaiyang denominasyon, usa (1) ka pakete sa sigarilyo nga gigamit isip sudlanan, usa (1) ka itom nga iPhone nga dunay SIM card, usa (1) ka yawe sa motorsiklo, ug usa (1) ka orange nga Honda Click 125 nga motorsiklo nga adunay plate number 168 JOG.
Ang dinakpan nga suspek tukma nga gipahibalo sa iyang mga katungod sa konstitusyon, lakip ang Miranda Doctrine ug Anti-Torture Warnings, sa usa ka pinulongan nga hingpit niyang nasabtan.
Ang mga nasakmit nga ebidensiya sa drugas maoy isumiter sa Zamboanga del Norte Provincial Crime Laboratory alang sa eksaminasyon, samtang ang suspek nagpabilin nga ubos sa kustodiya sa Piñan MPS alang sa tukmang disposisyon ug pagpasaka og kaso sa paglapas sa Republic Act No. 9165, ang Comprehensive Dangerous Drugs Act of 2002.(MEDALYN U. BORJA)
Source: ZNPPO