Tingkagol karon sa prisohan homan masikop ang usa ka 44 anyos nga gi tag nga Top 10 Most Wanted Person (MWP) sa kasong Rape mga alas 10:30 sa buntag niadtong Disyembre 3, 2025, didto Barangay Mercedes, Zamboanga City.
Naila ang dinakpan nga wanted person nga si alyas “Ron” 44 anyos, lalaki, minyo, ug residente sa Barangay Labakid, Sindangan, Zamboanga del Norte, kinsa gidakop pinaagi sa mga personahe sa Sindangan Municipal Police Station (MPS) isip lead unit sa koordinasyon sa 1st Zamboanga del Norte Provincial Mobile Force Company (ZNPMCC).
Ang pag-aresto gipatuman pinasikad sa warrant of arrest sa krimen nga Rape in relation to Republic Act 7610 (19 counts), nga gi-docket ubos sa Criminal Case Nos. S-4394 ngadto sa S-4412, nga gi-issue niadtong Hulyo 23, 2025 sa Family Court, 9th Judicial Region, Branch 05, Sindangan, Zamboanga nga walay piyansa nga girekomendar alang sa maong kalapasan.
Nasayran usab nga 16 ka tuig nga nagtago-tago ang akusado sa Sabah, Malaysia sa wala pa kini madakpi.
Ang tracker team sa Sindangan MPS, uban sa nadakpan nga wanted person, anaa karon sa kustodiya sa Sindangan Municipal Police Station alang sa tukmang dokumentasyon ug dugang legal nga disposisyon.(MEDALYN U. BORJA)
Source: ZNPPO