Nahimong mabungahon ang implementasyon sa Tulong Panghanapbuhay sa Ating Disadvantaged/Displaced Workers (TUPAD) Program sa Department of Labor and Employment (DOLE) human nga 338 ka mga benepisyaryo gikan sa lain-laing barangay sa Dapitan ang nahatagan og trabaho pinaagi sa maong inisyatibo, na gipahigayon niadtong Agosto 26, 2025, didto sa Ground Floor sa Dapitan City Hall.
Ang programa, nga gipatuman pinaagi sa paningkamot ni 1st District Congressman Roberto “Pinpin” Uy uban ang lig-on nga suporta ni Mayor Evelyn “Belen” T. Uy, nagtumong sa paghatag og temporaryong panginabuhian alang sa mga trabahante nga disadvantaged ug displaced.
Sa mosunod nga napulo (10) ka adlaw, ang mga benepisyaryo mahimong ma-empleyo sa community-based projects sama sa paglimpyo sa mga pampublikong dapit, pagmintinar sa kahinlo sa komunidad, ug pagsuporta sa mga health initiatives. Matag usa kanila makadawat og ₱3,810 isip kompensasyon alang sa ilang serbisyo.
Matod pa ni Mayor Uy, ang TUPAD dili lamang usa ka oportunidad sa trabaho, kondili usa usab ka hinungdanong tabang pinansyal alang sa mga pamilya, samtang naghatag og garantiya sa mas limpyo ug himsog nga komunidad.
Ang programa nagpabilin nga usa sa mga prayoridad nga inisyatibo sa gobyerno aron masuportahan ang mga sektor nga labing nanginahanglan, pinaagi sa paghatag og short-term employment nga makatabang sa pagpausbaw sa socio-economic nga kahimtang sa mga benepisyaryo.
Ang malampusong orientation nagtimaan sa opisyal nga pagsugod sa TUPAD program sa Dapitan, nga naghatag og bag-ong paglaum ug oportunidad alang sa mga benepisyaryo ug ilang pamilya.(Jumalisa Papa)
Source: Dapitan City Government